Dibata Kap Si Erbahan Keputusen - Entrepreneurship: Pang Ngalaken Resiko ( Bahan PJJ 8 - 14 September 2019 )

Bahan Bimbingen Perpulungen Jabu-Jabu 8 - 14 September 2019

Dibata Kap Si Erbahan Keputusen

(Entrepreneurship: Pang Ngalaken Resiko)

Ogen : Kuan-Kuanen 16:1-2

1. Manusia ersura-sura,
tapi Dibata kap si erbahan keputusenna.
2. Banci jadi payo iakapndu si idahikenndu,
tapi TUHAN kap si nimbangsa kai si lit i bas ukurndu.

Kitab Kuan-Kuanen eme sada kitab si isina kerna ajaren agama dingen ajaran kegeluhen si payo. Pengajaren e bentukna erbage-bage eme pedah-pedah, perumpaman dingen ajar, turi-turin kerna orat nggeluh si tep-tep wari. Adi si oge Kuan-Kuanen 16: 1 - 2 enda ( reh ulina adi si oge seh ayat 9 ), ije iajarken sada kinata kerna manusia. Labo lit kinibeluhenta sisada guna ngukuri kegeluhenta, entah pe pang kita ngatakenca maka kai pe banci jadi bagi sinisuraken. Situhuna, kerina kiningasupen ras kinibeluhen e rehna bas Dibata nari.Sabap Dibata tetap erdahin i bas kita gelah nggit dingen ngasup ndalanken si ngena ateNa ( bdk. Pil. 2:13; Msm. 10:17 ). Dibata erdahin masu-masu pusuh perukurenta bage pe si erdahin guna engkuhi ras mbereken kemauan / kininggiten bagepe pendahin. Emaka, payo manusia bebas ngukuri ras ersura-sura, tapi keputusenna tetap nge i bas Dibata.

Adi si perdiateken ayat 2, i petangkas man banta maka Dibata meteh kai si lit i bas ukurta. Emaka labo kita banci nipu Dibata entah pe erbuni-buni i lebe-lebeNa. Kerina si lit i bas pusuh manusia arus sue ras sura-sura Dibata.

Tep-tep jelma, tentu lit sura-surana, umpamana:

I bas pendahin.
Bicara kita sekalak perjuma-juma, sura-suranta segelah sinuan-sinuannta e mejile ras rani pe pagi banci kena ergana; adi sekalak perbinaga tentu sura-surana segelah lancar binagana e ras untungna e pe mbue; adi sekalak karyawan (baik swasta bagepe Pegawai Negeri) tentu sura-surana banci mejile karierna.
I bas jabu.
I bas jabu pe tentu lit nge sura-suranta, eme gelah anak-anakta sehat-sehat, seh sekolahna, dat dahin ka ia rikutken sura-surana, sikap ka perjabunna, kita pe mejuah-juah ka ras sidebanna.
Banci ka lit sura-sura berinvestasi, ngelitken mobil, rumah taneh, nukur emas ras sidebanna. Lit kuan-kuan nina: "tidak ada keberhasilan tanpa kerja keras." Erkiteken sie, enterem jelma si erdahin alu makeken gegeh ras kengasupenna, la jujur, korupsi, nipu ras sidebanna seh maka la ialokenna ulih si mehuli. Janah lit ka nge kalak si erdahin alu tutus ras mejingkat, tapi banci saja langa rulih bagi si isurakenna. Amin bage gia, si tutus erdahin dingen mejingkat ula minter "putus asa". Sabap banci saja langa seh paksana rikutken pengakap Dibata, entahpe langa sue bagi sura-sura Dibata.

Alu bage, iarapken man banta gelahna ngukuri ras ndalanken pendahinta e alu mehuli. Tetap si gargari bas pusuhta enggo kin ndia sura-suranta e sentudu ras peraten Dibata? Enggo nge ndia kita erdahin alu mehuli ras payo i adepenNa? Tetaplah si libatken Tuhan subuk i bas sura-suranta ras pendahinta e arah toto bage pe perenungenta. Bagi istilah Ora et labora; berdoa dan bekerja, e lah si lakoken bas kerina usaha ras pendahinta. Si jadi sikerajangenta eme mindo pasu-pasu Tuhan alu la erleja-leja bagepe pekena-kena ukurta ras kegeluhenta segelah si dalanken kita e mehuli ras benar i adepenNa. Si dalanken kegeluhen ras pendahinta alu payo, bicara uga gia kari ulihna, pengarapennta tetaplah ku Dibata. Kalak si erpengarapen la menukah putus asa bicara la rulih gia sekali.Tapi si e kerina dalan erlajar gelah reh mehulina i bas perukuren ras pendahin. Nina Winston Churchill: "Kesuksesan bukan akhir, kegagalan bukan hal yang fatal: itu adalah keberanian untuk melanjutkan apa yang penting."

EVALUASI :
Enggo silakoken aksi nyata i bas HUT PERMATA GBKP?

DISKUSI :

Kuga nge perbahanenta ( respon ) sedekah enda dikune kai sini suraken la bage ni dapet? Turikenlah!
Manusia ersura-sura, tapi Dibata kap sierbahan keutusen. Turiken pengangkanndu kerna kata enda!

AKSI :
Darami serpang pulah i bas sada dahin ntah usahanta siiakap gagal paksa enda.

USULEN LAGU :

TOPIK PERTOTON SYAFAAT :

Gelah ngawan ni perpulungen tetap erpersukuten man Dibata i bas nehi sura-sura ras pendahinna.
Gelah ngawan ni perpulungen tetap erpengarapen man Dibata bicara kai gia si terjadi bas kegeluhen ras pendahinna.
Gelah Dibata masu-masu pendahin kerina ngawan ni perpulungen.

Pdt. Andinata Ginting, S.Si. Teol.