Gegeh Tuhan Negu-Negu Bangsanta - Bahan PJJ 9-15 Agustus

Bahan Bimbingen Perpulungen Jabu-Jabu 9-15 Agustus 2020
GEGEH TUHAN NEGU-NEGU BANGSANTA
( HUT RI 75 / POLITIK )

Ogen : Keluaren 15:11-13

11. O TUHAN, apai kin dibata-dibata si bali ras Kam?
Labo lit ise pe bagi Kam badiana.
Ise kin si ngasup erbahan tanda kuasa
ras perbahanen si mbelin bagi si ibahanNdu?
12. Ipepinter Kam tanNdu si kemuhen,
e maka musuh kami itelen doni enda.
13. Erkiteken setia Kam man padanNdu,
itaruhken Kam bangsa si enggo ipulahiNdu;
alu gegehNdu itegu-teguNdu ia
ku tanehNdu si badia.

Merdeka...Merdeka...Merdeka, enda me ungkapen si igemaken kerina rakyat Indonesia tupung Merdeka i bas penjajahen nari janah ungkapen enda ka si igemaken tupung kita kerina emperingeti wari kemerdekaan negaranta, lndonesia. Wari Ulang Tahun kemerdekaan negara nta si 75 tahun enda bakal ipersingeti bas ininggu enda. Erti Merdeka rikutken Kamus Besar Bahasa Indonesia eme keadaan berdiri sendiri ( bebas, lepas, tidak terjajah lagi ). Si lakoken kita i bas ngaloken kemerdekaan enda eme ngataken bujur man Tuhan Dibata, erkiteken arah lias ras perkuah ateNa kita enggo imerdekakenNa arah penjajahan Jepang ras Belanda nari.

Keluaren 15:11-13 nuriken ende-enden kemenangen si jadi pujin dingen mpeturah kiniteken si mbages. Enda enggo ersada ras geluh pe biak kalak Israel, ende-enden enda jadi sora pusuh si mbagesna si jadi palas tetap setia man Dibata. Arah e pe Musa nuduhken buah kinitekenna alu tetap erdahin alu tutus guna kiniulin bangsa e. Musa nggejab maka labo perban kebeluhen ras gegehna i bas memimpin kalak Israel maka banci ia ndarat Mesir nari, tapi erkiteken lias ras perkuah ate Dibata. I bas sienda Musa nggejapken maka Dibata si isembahNa eme Dibata si mbisa ras si rejin, ia seri ras dibata-dibata si deban. Pengakun Musa maka labo lit singasup erbahan tanda kuasa ras perbahanen simbelin bagi si ibahan Dibata. Ertina belinen kap Kuasa Tuhan asangken kuasa Raja Piraun sebage pemerintah i Mesir. Enda banci si idah, ija labo lit senjata si hebat i bas kalak Israel janah i bas dampar si deban tentara Mesir kuh kerinana perlengkapenna, amin bage gia tentera Mesir talu ras ikernepken Tuhan alu tanNa si kemuhen ( tan kemuhen eme simbol Dibata kerna kuasaNa ras penampatNa man  bangsana ) ku lawit Merah (laut Teberau). Sienda nuriken maka pibata tetap setia nandangi perpadanenNa man kalak Israel, seh okana enggo itaruhken Dibata kalak Israel ndarat i bas Perbudaken Mesir nari, janah tetap itegu-teguNa kalak Israel seh ku taneh Kanaan.

Perbahanen Dibata mulahi bangsata pe tangkas banta ija Belanda naban kita lit 350 tahun dekahna ras itaban Jepang sedekah 3,5 tahun. I bas tabanen e tentu tuhu-tuhu bangsata ngenanami kiniseran bage pe adi si idah perlengkapen senjata bangsanta mbarenda alu make bambu runcing guna ngelawan penjajah, maka kita labo banci menang ngelawan penjajah. Tapi Dibata tetap masu-masu arah perjuangenta, ija pejuang ras rakyat sisampat-sampaten erjuang ngelawan penjajah. 

Bangsa Indonesia ngakui arah sejarah bangsa enda si banci pulah i bas penjajah nari erkiteken perkuah ate ras penampat Dibata. Siteridah arah alinea pertama isi pembukaan UUD 1945 tersurat "bahwa kemerdekaan itu adalah hak segala Bangsa dan oleh sebab itu maka penjajahan di atas dunia harus dihapuskan, karena tidak sesuai dengan prikemanusiaan dan perikeadilan". Enda me si enggo isuratken pemerintahnta segelahna kita banci ndatken kebebasen i bas negerinta enda. Dahin ras tanggungjababta me guna mpertahanken kemerdekaan janah peperangenta genduari labo nari man penjajah tetapi perang ngelawan narkoba, judi/togel, warung remang-remang, meja bola/jekpot, sampah plastik, perambahan hutan, politik uang, begal, berita hoax, selingkuh, miras, warnet porno, bebas, korupsi ras radikalisme agama. 

Kerina enda jadi pinakit si mekelek si banci naban bangsa enda khususna generasi penerusta ta banci ceda. Adi la kin kita radu ras ngelawanca banci dungna jadi musuh dalam selimut, sidungna naluken kita i bas nari. La siarap dingen banci kita sengget, enggo talu kepe kita. Emaka metengetlah, tetap turiken kenirejinen Dibata, sicidahken ras silakoken sura-surana alu tetap kita ngerana dingen menyuaraken sora kenabian rikutken sura-sura Tuhan Jesus.

Alu bage banci kita jadi pejuang-pejuang si la mbiar, nggit ras pang erkorban guna mempertahanken negaranta. Intina Negara Kesatuan Republik Indonesia (NKRI) harga mati man banta kerina. Bage pe ula kal kita lupa guna tetap notoken pemimpin, anggota Dewan pe segelahna banci tetap erdahin mpekena-kena situasi ras keadaan i bas negaranta enda.
 

EVALUASI :
Enggo me silakoken "sapa, sentuh, senyum" man orangtuata Saitun?

DISKUSI :

1. Kuga penggejapenta kerna penegu-negu Tuhan nandangi perdalanen bangsa ras negaranta?
2. Siksikilah i bas dirita ras jabunta, kai-kai saja si megati naban kita i bas jaman enda? Kai sibahan maka banci pulah?

AKSI :
Kebersihen rumah, gereja, kuta atau kota, sekolah, kantor, kegiaten nonton film kemerdekaan, jiarah ku makam pahlawan, mengikuti upacara HUT RI i bas inganta masing-masing.

USULEN LAGU :

1. KEE GBKP No. 372: 1-3
2. KEE GBKP No. 307: 1-3
3. KEE GBKP No. 201: 1-3
4. KEE GBKP No. 289: 1-3
5. KEE GBKP No. 329: 1,2
6. KEE GBKP No. 331: 1,5

Topik Pertoton Syafaat :

1. Ngataken bujur i bas perdalanen bangsa lndonesia.
2. Gelah generasi gereja ras generasi bangsa erjuang ngelawan pinakit sosial ras kejahaten.

Pdt. Masada Sinukaban, M. Si ( Teol )

Share this post