Pasu-Pasu Tuhan Man Kalak Si Malang Man Bana ( Bahan PJJ 16 - 22 Agustus )

 

Bahan Perpulungen Jabu-Jabu 16 - 22 Agustus 2020
Pasu-Pasu Tuhan Man Kalak Si Malang Man Bana
( HUT MAMRE GBKP Pe-25 Ken )

Ogen : Masmur 128:1-6

Pasu-pasu TUHAN man isi jabu
1. Sangap kal kalak si malang man TUHAN,
si nggeluh ngikutken kerina perentahNa.
2. Ipanna me ulihna latih,
sangap nggeluh, mehuli sikerajangenna.
3. Ndeharana bali ras anggur si meramis buahna i bas rumahna,
dingen anak-anakna bali ras tunas batang saitun i sekelewet mejana.
4. Bage me pasu-pasu TUHAN,
man kalak si malang man baNa.
5. TUHANlah si masu-masu kam i Sion nari,
mbera idahndu kesangapen Jerusalem kidekah umur geluhndu.
6. Cawirlah kam metua,
maka sempat idahndu kempu-kempundu.
Damelah sikerajangen Israel!

Kerina manusia si nggeluh idoni enda pastina erpengarapen jadi kalak si ipasu-pasu. Emaka labo ngadi-ngadi manusia erbintuas erdahin gelah kegeluhenna labo kekurangen. Enda pe berlaku nge i bas kegeluhen kalak karo i bas perayaken kegeluhenna eme ndatken tuah, sangap, ras mejuah-juah. Tuah ertina ndatken keturunen, sangap ertina jumpa rejeki, ras mejuah-juah ertina sehat ras dame. Penungkunenna enggo nge ikatakan kita sangap i bas Dibata adi sitelu hal enda ndai jadi sikerajangenta? Kerina jelma terlebih kalak si enggo njabuken bana ngarapken sitelu enda jadi sikerjangenna i bas doni enda. i bas renungen PJJ nta enda ras-ras kita kari niksiki kai nge kunci guna ndatken pasu-pasu i bas Tuhan nari ras pasu-pasu kai nge i bere Dibata man kalak simalang man baNa.  

I bas kitab Masmur 128: 1-6 i turiken kunci ndatken pasu-pasu bas Tuhan nari bage pe pasu-pasu kai nge si ibereken Dibata man jabu.

• Kalak si malang man Dibata ras singgeluh ngikutken kerina perentahNa eme kalak si sangap. Erti kalak simalang man Dibata (takut akan Tuhan) eme kalak simaba dame ras si la erngena ate nandangi kejahaten, kalak si megiken ras ndalanken perentah Dibata. Malang man Dibata (takut akan Tuhan) ras nggeluh ngikutken perentahNa eme sipenting i bas kegeluhen kalak sierkiniteken. Enda banci turah i bas pusuhta adi si tandai Dibata si sembah kita e
• Adi payo penandaita tentu labo ateta erbahan ceda ate Dibata arah kata ras perbahanen. i bas kegeluhen kalak si malang man Dibata enggo sitadingken kerina kegeluhen sindekah ras kerina perbahanenna si la ngena ate Dibata eme erjudi, erlua.-lua, merampus, perkisat, la setia, la nggit erdame, ras si debanna.
• Kesangapen kalak simalang man Tuhan ras singikutken kerina perentahNa teridah arah banci ia man ulihna latih ras sangap nggeluh. Si latih encari arus ngenanami ulih latihna si jadi kesangapen. Ula min sempat ulth latihta e terjeng jadi pertambar. Ndehara labo terjeng mupus anak i tengah-tengah jabu, tapi lebih asa sie sekalak ndehara mereken kedamen, kehangaten, kenyamanen, man perbulangen ras anak-anakna. Sekalak ndehara tuhu-tuhu jadi penampat man perbulangenna i bas ngepkep anak-anak. Bage pe Anak-anak e mereken keriahen man jabu arah kegeluhenna terkusus man jabu. I bas sienda mbelin tuhu peranen sekalak bapa (mamre) i bas nehisa. Adi bapa (mamre) jadi teladan i bas kiniteken bage pe perbahanen tentuna e jadi usihen man anak-anak. Engkai maka mbue genduari anak-anak si gutul (bermasalah)? Biasana orang tua muat kesimpulen maka enda akibat pergaulan. Padahal mbelin kel tuhu peranen jabu, banci jadi orang tua, terlebih bapa, ntah lenga ngasup jadi teladan i bas kiniteken ras perbahanen. 

Pasu-pasu Dibata reh kutengah-tengah jabu i benaken i bas kegeluhen tep-tep anggota jabu si erkemalangen man Dibata. I bas kegeluhenta paksa enda, rikutken kecibal jaman si reh majuna, jabu arus nikapken generasi masa depan, subuk kalak Karo, indonesia bage pe gerejanta, maka bapa arus lebih muat bagin mpebelin anak kerna kegeluhen si malang man Tuhan. Bapa lebih mereken usihen ras pengajaren guna nilahken anak i bas erbage pengaruh jaman si banci mabai ia lanai jadi tunas batang saitun ku tengah jabu. Bapa njaga geluhna gelah teta malang man p Dibata gelah ialokenna pasu-pasu e i bas g jabuna. Radu ras eluh ras jab ndehara bage pe anak ngenanami kemalemen ate.

EVALUASI :
Kai dage enggo lit silakoken i bas kita mperingeti HUT R1 pe-75 ken?

DISKUSI :

1. Turiken tanda-tanda jabunta si malang man Dibata?
2. Kai-kai saja si arus ilakoken Mamre gelah jabuna malang man Dibata?

AKSI
i bas HUT Mamre si pe 25, Mamre nehken perbahanen (umpamana: masak spesial, ngajuk ras mabai isi jabu ertoto/ibadah keluarga ntah pe ngelitken waktu ras keluarga) si jadi tanda kekelengen man isi jabuna.

USULEN LAGU :

1. KEE GBKP No. 248 : 1,2
2. KEE GBKP No. 307 : 1-3
3. KEE GBKP No. 343 : 1- (Persembahen)
4. KEE GBKP No. 203 : 1,2

TOPIK PERTOTON SYAFAAT :
Ertoto gelah kerina mamre jadi perbulangen si erkemalangen man Dibata, jadi usihen i bas kiniteken.
Ertoto gelah mamre tuhu-tuhu jadi mamre si ertanggung jawab man jabuna.
Notoken kerina pengurus mamre GBKP (pusat, klasis, runggun, perpulungen,PJJ).
Siturah i bas perpulungen

Pdt. Riyal Ginting, S.Si.

Share this post