Lias Ate Tuhan Si Ngajari ( Bahan PJJ 23-29 Agustus )

Bahan Perpulungen Jabu-Jabu 23 - 29 Agustus 2020
Lias Ate Tuhan Si Ngajari
( Pentingna Pembinaan Warga Gereja )

Ogen : Titus 2:11-15

11. Sabap enggo ipetangkas Dibata lias ateNa guna keselamaten kerina manusia.
12. Lias ateNa e ngajari kita nadingken kegeluhen si la ngena ate Dibata ras sura-sura doni, gelah nggeluh kita ngkuasai dirinta, bujur dingen si sembah Dibata alu kegeluhenta i doni enda.
13. Genduari kita paksa nimai Wari kemalemen ate si iarapken kita e me kerehen sinalsal Dibatanta si Mbelin ras si Engkelini kita Jesus Kristus.
14. Enggo iendeskenNa diriNa guna kita, lako nebusi kita i bas kerina si jahat nari, jenari ibahanNa kita jadi sikerajangenNa, jadi bangsa si bersih, si mesikel erbahan mehuli.
15. Ajarkenlah si enda kerina, janah pakelah kerina kuasandu i bas kam ngajuk dingen mandang kalak. Ola pelepas kalak mapas man bandu.

I bas perdalanen peteluken meritaken Berita Si Meriah Rasul Paulus ndilo Titus jadi temanna. Enda sada sistim "kaderisasi" si ban Paulus. Sope si e Timotius enggo leben ndube nemani perdalanen Paulus. Genduari Timotius ngelai perpulungen i Epesus. Bage pe kenca piga-piga ingan si idahi Paulus subuk Troas seh dungna Epesus ndahi Timotius. Kedungenna seh i pulau Kreta. Ijenda itadingkenna Titus guna ngelai perpulungen Tuhan. Kenca piga-piga paksa ijah ia ngelai maka mehuli akap Paulus erban surat enda guna mpegegehi Titus ras ngajari ia ngelawan pengajar-pengajar papak paksa si e. 

I bas suratna man Titus si jadi bahan PJJ ta enda Paulus ngajari Titus kerna salah sada si pentingna ras muliana i bas kegeluhen kalak si tek eme 'lias ate Dibata'. Nina Paulus enggo ipetangkas Dibata.... Kata ipetangkas ijenda eme desken matawari pultak erpagi-pagi maka kerina kegelapen enggo lewat. Si erbahanca kegelapen e enggo lewat eme lias ate Dibata. Lias ate (Jun: caris) eme pemere Dibata entah perkuah ate Dibata. Kai kin pemere Dibata e? Eme Jesus Kristus si enggo reh ku doni enda, si enggo mate tupung kita erdosa denga (bdk. Rm.5:6). Lias ate e si ngajari kita nadingken kegeluhen si gelgel. Si ngidah ras nggejap lias ate Dibata si bage belinna me si nadingken kegeluhen si dem alu dosa. Ise si natap Tuhan Jesus alu kiniteken maka jadi me kegeluhen si mbaru i bas dirina. Nggeluh alu engkuasai diri, bujur dingen ersembah man Dibata i doni enda. Engkuasai diri ertina maka la ia terbaba ku bas perayaken daging kulana ras perayaken doni enda. Bujur ertina beluh encibalken dirina, arah perukuren, pengerana ras perbahanenna teridah kepentaren Dibata arah ia. Ersembah man Dibata maka kerina kai pe si lakokenna eme "ibadah" na si tuhu-tuhu. Labo terjeng i gereja ras perpulungen saja tapi ijapa pe ras katawari pe. 

Pengarapen kalak si tek eme nimai wari kemalemen ate eme kerehen sinalsal Dibata si Mbelin ras si ngkelini kita Jesus Kristus. Nai nari salah sada erbahanca tahan kalak si tek ngalaken kerina perbebenna eme pengarapenna nandangi kerehen Jesus Kristus. janah enda rusur ajarken Paulus man perpulungen bage pe man temanna sada aron eme Titus ijenda. Ieteh Paulus maka labo mesunah jadi singepkep perpulungen. Maka adi kune erbage perbeben si man alanken pengarapen e terus nggeluh ras erburak-burak i bas pusuh. Emaka lit pernyatan ngataken,"banyak yang hilang dariku, tapi satu yang tidak bisa hiiang yaitu pengharapanku." Ertina bage me pentingna pengarapen man kalak si tek. 

Perbahanen Tuhan i bas nebusi kita i bas paksa si lewat njadiken kita jadi bangsa si bersih, si mesikel erbahan si mehuli. Bersih ijenda eme "menguduskan" kita. Ertina Dibata nerapken kita i doni enda nari bengket ku bas sada persadan si badia ras IA. Labo perban kita badia, tapi IA nge si pebadiken kita. Tandana kita enggo ngaloken perbahanen Dibata si bage ulina man banta maka kita pe mesikel erbahan si mehuli (rajin berbuat baik). Erbahan si mehuli eme buah keselamaten si enggo si aloken arah lias ate Dibata. Emaka melala pe si ban perbahanen si mehuli labo e jasa, entah prestasi tapi enda pengataken bujurta man Dibata si enggo nebusi kita. Emaka la lit dalanna kalak Kristen meganjang rukur uga lalana pe perbahanenna si mehuli. 

Paulus ngajuk Titus gelah ngajarken si enda kerina man Perpulungen. Tentu arapen Paulus gelah kerina perpulungen e pe nggeluh erpalasken lias ate Dibata, nggeluh i bas pengarapen si Payo janah mesikel erbahan si mehuli segedang-gedang geluhna. Paulus ngidah pentingna lit proses ngajar ras erlajar i bas gereja. Labo sekali enda ngenca maka man Timotius pe rusur ikatakenna si enda (bdk. 1 Tim. 4:11, 5:20). Bage me i bas gerejanta proses erlajar ras ngajar enda iteruh koordinasi Pusat Pembinaan Warga Gereja (PPWG). Tapi pe labo cukup adi PPWG ngenca, erdandanken si e rnaka larapken nggeluh i bas Klasis ras Runggun. PPWG nikapken ras bahan-bahan pengajaren GBKP. Emaka semaina i ban pelatihen man Klasis, janah Klasis ka nehkenca ku Runggun-Runggun.

Gereja si megegeh eme gereja si erlajar ras ngajar terus. Emaka adi si perdiateken pe Jesus, kuja pe IA perlebe ilakokenNa eme ngajari jelma si enterem. Ieteh Jesus maka arah erlajar kerna Kata Dibata kiniteken banci turah ras kedungenna erbuah. Alu bage maka adi ateta megegeh gerejanta, pegegehilah PWG. Nehen ras dukunglah program-programna. Guna si e maka perduiten gerejanta si enem puluh persen (60%) banci iaturken Runggun guna mpebue program PWG. Jadi ula sempat la erdalan PWG i bas Klasis entah Runggunta. Abraham Lincoln pernah ngataken, "aku merasa puas ketika Tuhan menginginkan sesuatu yang kulakukan, dan aku tahu cara melakukannya." PWG nge mbimbing perpulungen gelah si eteh peraten Tuhan janah si eteh uga ndalankenca.

EVALUASI :
Kai dage lit si ilakoken Mamre i bas ia ngataken bujur i bas ngerayaken HUT na? 

DISKUSI :

1. Uga siakap pentingna pengajaren i bas sada agama?
2. Kai siakap si penting sitingkatken i bas program PWGta?
   

AKSI :
Bahan ras dukunglah program PWG alu pertoton ras mereken masuken si positip. 

USULEN LAGU :

1. KEE GBKP No. 197:1-3
2. KEE GBKP No. 389:1-3
3. KEE GBKP No. 451:1-
4. KEE GBKP No. 309:1-2

TOPIK PERTOTON SYAFAAT

1. Gelah PWG erdalan i bas kerina pelayanen gerejanta.
2. Gelah kiniteken perpulungen reh paguhna erpalas pengajaren GBKP.
3. Si mada jabu.
4. Bangsa ras negaranta gelah tetap i pasu-pasu Tuhan.

Pdt. Yunus Bangun, M.Th.

Share this post