Mehamat Man Si Enggo Metua - HUT Saitun 15 Agustus pe-29 ken ( Bahan PJJ 2-8 Agustus )

Bahan Perpulungen Jabu-Jabu 2 - 8 Agustus 2020

Mehamat Man Si Enggo Metua

( HUT Saitun 15 Agustus pe-29 ken )

Ogen : Imamat 19:1-3

Undang-undang kerna kebadian ras keadilen
1. Ikataken TUHAN man Musa,
2. gelah ipesehna man perpulungen kalak Israel bagenda, “Badia lah kam, erkiteken Aku, TUHAN Dibatandu badia kap.
3. Kerina kam arus mehamat man nande ras bapandu, janah arus nginget wari Sabat, bagi si enggo Kuperentahken. Aku kap TUHAN Dibatandu.

Imamat 19:32
32. Mehamat lah man kalak si enggo metua, janah pehaga lah Aku. Aku kap TUHAN.

Imamat 19 ngerana kerna orat nggeluh kalak si tek si lit kawitenna ras kebadian bage pe keadilen. Pesan pengajaren ibereken Dibata man Musa gelah i peseh Musa man bangsa Israel. Perban Dibata Badia, maka kerina kalak Israel si enggo i pilih, si enggo i bebasken i bas perbudakan i Mesir arus nggeluh Badia seri ras Dibata si isembahna. Badia siertina la melket, serta bage pe la tercurna. Kegeluhen badia pe teridah arah mehamat man nande ras bapa.

Enda me si jadi renungenta i bas bahan PJJta minggu enda sendalanen ras wari ulang tahun Saitun ( Lansia GBKP ). Patut sekalak anak mehamat man orangtuana ( nande ras bapana ) ija ia enggo ipebelin kitik-kitik nari, ibenaken ia la meteh kai pe seh enggo mbelin dingen meteh mehuli. Uga orangtua erdahin ku juma, ku kantor, ku pajak, nahanken las, udan, latih, kena rawa pelangganiatasan, lenga ka ipalitken teman sada dahin, si deher rumahna, ras si debanna. Tapi orangtua tetap erdahin pebelin-belin anak-anakna. Mawen melihe pe ia la katakenna perban nakan si lit pe bias man anak-anak ngenca, dikune pe enggo gejabna mesui takalna ntah pe ngindet dagingna labo ia kelsehen, seh maka mekelek maka ieteh anak-anakna. Pengorbanan orangtua man anak-anakna la ternilai dingen la tergalari.

Perintah Dibata i bas ayat 3: kerina kam harus mehamat man nande ras bapandu, kata enda iulihi jadi persinget i bas Keluaren 20:12, "Mehamatlah man bapandu ras nandendu gelah banci kam ndekah nggeluh i bas negeri si Kubereken man bandu pagi". Enda si penting siarus iajarken man anak-anak i bas kerina paksa ras kecibal, paksa ia kundul, tedis, erdalan bage pe muat ia tunduh.

Lit si perlu siperdiateken, kerna perintah enda : mehamat man orangtua / nande bapandu la lit tambahenna, misalna siertanggungjawab, si la perjudi, si lit pendahinna, ras si debanna. Payo, lit nge bagi mesera ndalanken perentah enda apai ka lit anak si mpebelin pusuh si rido-ido man orang tua dingen orangtuana e la bagi si niarapkenna. Alu kata si deban mesunah nghamati kalak si bas ia lit kepentaren, idalankenna geluhna bagi singena ate Tuhan sebalikna mesera nghamati kalak si egois ( murah rubati ), la ertanggungjawab ( pelaku pinakit sosial ) la erkemalangen man Dibata.

Terdauhen si seh kal pentingna si perlu iperdiateken anak-anakna kerna mehamat man orangtua khususna si enggo ermasaleh kesehatenna. Ertina menukah ngkelengi orangtua si sehat denga dingen ngasup mereken pedah ras keleng ate man anak-anakna tapi mesera kal mehamat man orangtua sienggo sakit-sakiten, enggo stroke, tehtehen, enggo kolihen seh pe pengeranana lanai erkesehen, enggo melukah merawa la turi-turin, ras enggo lanai lit ertana. Perlu keleng ate si njulus, kesabaren si luar biasa bage pe pengorbanen i bas sekalak anak.

I bas minggu enda kita ipersingeti mulihi kerna uga orat nggeluh kalak sierkiniteken/anak-anak Dibata kerna mehamat man orangtua i bas kerina situasina. Sikataken bujur man Dibata adi lengkap denga nande ras bapanta, bage pe sehat denga ia. Adi enggo lanai lit nande entah bapanta, entah duana, lit persadan Saitun bas gerejanta ije me si idah nande ras bapanta ndube. Lit ka orangtua Saitun si "sakit" si elai Gerejanta GBKP i Sukamakmur gelar PPOS, arah ndahi orangtuanta si tading bas PPOS tertambari ketedehen ateta nandangi orangtuanta ndube.

Marilah MAMRE, MORIA, PERMATA, ras KAKR mehamat kita man orangtuanta, mediate kita, ula tokohi, bereken man orangtuanta sienggo lanjut usiana kesempatan ngerana / mere pendapat. Berekenlah keperluan orangtua :
I bas Gereja : misal na i bas kita mbangun gereja ula meganjangsa tanggana, gelah ngasup orangtuanta Saitun napakisa, entah tambahi ka ingan dalan kursi roda i bas sada sisi dalan ku bas. I bas gereja bahan ingan khusus arah lebe man Saitun, bangkuna ban busana sitik gelah ngasup orangtuanta kundul bas bangku gereja, kamar mandi ula ndauh arah gereja nari. Adi Lakon Persadan Si Badia i bas Jumat Simbelin si ielai ku rumah-rumah Saitun si la ku gereja perban kurang kesehatenna.

I rumah : sisikapken waktu guna ngerana-ngerana, megiken turi-turinna sienggo 100 kali iulih-ulihina. Alu ngelakoken "sapa, sentuh ras senyum" aminna teluna perbahanen enda mesera siakap mbiasakenca tapi perlu kal ialoken orangtuanta tandana ia sikelengi itengah keluarga. Si sungkun pendapatna i bas diskusi keluarga, gelah meriah ukurna dingen igejabna maka ia erguna denga.

Ijapa pe inganna orangtuata Saitun arus igejabna min maka umur sigedang labo jadi kebiaren tapi jadi pasu-pasu, umur meganjang emekap 'usia indah' sabab la kerina kalak banci ndatken umur si gedang 60-70-80-90 seh pe 100 tahun. Selamat Ulang tahun man orangtuanta Saitun i rumah bage pe bas gerejanta GBKP bage pe Saitun si tading bas PPOS, tetap semangat geluhken kegeluhenndu sabab kami anak-anak ndu mehamat man bandu.

EVALUASI :
Lit nge dage inventaris si perlu silitken ulih PJJ minggu si lewat?

DISKUSI :

1. Turiken perbahanenta sedekah enda man orangtuata janah kuga enda rikutken bahan PJJta sendah? 2. Kai tole sibanci si bahan i bas jabu bage pe gereja tandana kita mehamat man Saitun?
2. Sapa, sentuh ras senyum lah kam adi jumpa ras Saitun.

USULEN LAGU :

1. KEE GBKP No. 338 : 1,3
2. KEE GBKP No. 374 : 1,2
3. KEE GBKP No. 425 : 1,2
4. KEE GBKP No. 443 : 1-

TOPIK PERTOTON SYAFAAT :

1. Gelah kerina anak-anak mengintrospeksi diri janah ertekad mperbaiki hubungen ras orangtuanta. Gelah kerina Saitun ngasup tetap erpengarapen masa tuana.
2. Gelah kerina lembaga kategorial perduli nandangi Saitun.

Pdt. Henriette Jean Pelengkahu, S.Th

Share this post